काठमाडौं :एप्पलले केही वर्षदेखि भारतमा आईफोन उत्पादन गरिरहेको छ । अब कम्पनीले सन् २०२२ को फेब्रुअरीदेखि भारतको चेन्नईमा रहेको प्लान्ट (कारखाना) मा आईफोन १३ पनि उत्पादन गर्ने भएको छ ।
द इकोनोमिक टाइम्सको एक रिपोर्टअनुसार एप्पलले एकैपटक ठूलो संख्यामा आईफोन १३ उत्पादन गर्न लागेको हो । यसका लागि कम्पनीले आवश्यक सेमिकन्डक्टर चिपको आपूर्ति सुरक्षित गरिसकेको जनाइएको छ ।
एप्पलले चेन्नईस्थित फक्सकनको प्लान्टमा आईफोन १३ को परीक्षण उत्पादन सुरु गरिसकेको छ । यो प्लान्टमा आईफोन ११ र आईफोन १२ पनि उत्पादन हुने गर्छ ।
फक्सकन प्लान्टका अतिरिक्त एप्पलले बेंगलुरुको विस्ट्रोन फेसिलिटीमा आईफोन एसई उत्पादन गरिरहेको छ ।
हाल भारतमा बिक्री हुने आईफोनमध्ये ७० प्रतिशतभन्दा बढी फोन स्थानीय प्लान्टमै उत्पादन भइरहेको छ । आईफोन १३ पनि भारतीय प्लान्टमै उत्पादन हुने भएपछि स्थानीय बजारमा यसकाे मूल्य घट्ने अनुमान गरिएको छ ।
साथै विदेशमा आपूर्ति बढाउन पनि यसले सहयोग पुर्याउने बताइएको छ । हाल भारतमा उत्पादित २० देखि ३० प्रतिशत आईफोन विश्वव्यापी बजारमा निर्यात गरिन्छ ।
