टीकापुर, :कैलालीको टीकापुर अस्पतालमा उपचाररत बिरामीका लागि अक्सिजनको व्यवस्था गर्न नागरिकस्तरबाट सुरु भएको अभियानमा सहभागीको संख्या दिनानुदिन बढ्दै गएको छ । अक्सिजन सहयोग अभियान शुरु भएको आज तेस्रो दिनमै २५ लाख भन्दा बढी रुपैयाँ संकलन भएको छ ।
टीकापुर अस्पताल, टीकापुर उद्योग वाणिज्य संघ र टीकापुर सरोकार समूहले अभियान सुरु गरेका हुन । अभियानमा देशविदेशबाट थुप्रै व्यक्तिहरुको सहभागीता रहेको पाईएको छ । अध्यक्ष भण्डारीका अनुसार टीकापुर घर भई हाल अमेरीका, जापान, दक्षिण कोरीया, अफ्रिका, अष्टेलिया र खाडी मुलुकमा रहेका व्यक्तिहरुले अभियानमा साथ दिएका छन ।
अमेरिकामा रहेका विष्णु शाहले अभियानमा रकम संकलनका लागि सबैसँग समन्वय गरिरहेका छन । उनले आफै अभियानमा १ लाख रुपैयाँ सहयोग गरेका छन ।
टीकापुरमै रहेका व्यक्तिहरुले समेत अभियानमा साथ दिएका छन् । ब्यापारी व्यवशायी र जागिरे मात्रै हैन सामान्य जीवनशैली भएका व्यक्तिहरुले समेत अभियानमा सक्दो साथ दिएको टीकापुर उद्योग वाणिज्य संघका अध्यक्ष रामबहादुर भण्डारीले जानकारी दिए । उनका अनुसार अभियानमा रकम जम्मा गर्न स्थानीय आफै उत्साहित भएका छन । ‘हामीले सुरुवात मात्रै गरेको हो’ उनले भने -‘अहिले आफै रकम जम्मा गर्नेको संख्या बढ्दै गएको छ ।’
कैयौं व्यक्तिले सामुहिक रुपमा समेत अभियानमा रकम जम्मा गरिरहेका छन । कैलालीको पूर्वी भेगमा रहेका विभिन्न शैक्षिक संस्थाहरुले आफ्ना शिक्षक कर्मचारीहरुबाट रकम संकलन गरेर अभियानमा साथ दिएका छन । रकम जम्मा गर्ने शैक्षिक संस्थाको संख्या बढ्दै गैरहेको छ ।
‘हामीले विपदको घडीमा सक्ने सहयोग गरौं न भनेर सल्लाह गर्र्यौ धेरै साथीहरु सकृय रुपमा लाग्नु भएको छ’ नेपाल शिक्षक महासंघ टीकापुरका अध्यक्ष रघुनाथ उपाध्यायले भने -‘अझ धेरै रकम संकलनकै क्रममा छ ।’
टीकापुर अस्पतालमा अक्सिजन नपाएर बिरामीको मृत्यु भएको समाचार प्रकाशित भएपछि नागरिकस्तरबाट अभियान सुरु भएको हो । अभियान सुरु भएपछि अस्पतालमा अक्सिजन आपूर्ती केही सहज बनेको छ । अभियान अन्र्तगत अस्पतालमा हालसम्म २० वटा सिलिण्डर प्रदान गरिएको छ भने थप १० सिलिण्डर खरिद भएर हस्तान्तरणको क्रममा रहेको अध्यक्ष भण्डारीले जानकारी दिए ।
केही व्यवसायीहरुले अस्पताललाई अक्सिजन सिलिण्डर भरेर दिएका छन । उनीहरुले स्थानीय बिक्रेताबाट अक्सिजन सिलिण्डर भरेर दिएका हुन । व्यवशायीहरुले अक्सिजन सिलिण्डर भरेर दिएपछि अस्पतालमा अक्सिजनको समस्या केही हदसम्म सहज बनेको छ ।
टीकापुर अस्पतालका कोरोना फोकल पर्सन डा. रमेशप्रसाद उपाध्यायले अक्सिजनको अभाव यथावत भएपनि पछिल्लो २ दिन यता केही सहज बन्दै गएको बताए । ‘हामीसँग ब्याकअप छैन’ उनले भने -‘तर अहिले बिरामीले अक्सिजन पाईरहेका छन ।’
अस्पतालमा अक्सिजन नपाएर बैशाख २६ गते ६ र २७ गते ८ जना कोरोना संक्रमितको ज्यान गएको थियो । अक्सिजन आपूर्ती सहज बनेपछि अस्पतालमा कोरोना संक्रमितको मृत्युदर घटेको छ । फोकल पर्सन डा. उपाध्यायका अनुसार हिजो २ र आज १ जनाको ज्यान गएको छ ।
