धनगढी:कैलालीमा जंगली जनावरको शिकार गर्ने व्यक्तिहरुको पिछा गर्ने क्रममा मोटरसाइकल र बन्दुक बरामद गरिएको छ।
मंगलबार राति जिल्लाको गौरीगंगा नगरपालिका–७ को सुनपाल सामुदायिक वनमा शिकार खेल्ने शिकारीको समूहका साथबाट मोटरसाइकल तथा बाह्र बोर बन्दुक बरामद गरिएको हो।
वनका उपाध्यक्ष तथा चोरीशिकारी नियन्त्रण दलका संयोजक विजय सार्कीको नेतृत्वमा खटिएको टोलीले से६प ७४८६ नम्बरको पल्सर मोटरसाइकल तथा बाह्रबोर बन्दुक बरामद गरेको हो।
टोलीले शिकारीको पिछा गर्ने क्रममा मोटलसाइकल र बन्दुक बरामद भएको संयोजक सार्कीले बताए।
उनका अनुसार शिकारीको समूह भने फरार भएको थियो। बरामद मोटरसाइकल र बन्दुक ईलाका प्रहरी कार्यालय मसुरियालाई बुझाइएको छ।
प्रहरीका अनुसार फरार शिकारीको खोजी कार्य भइरहेको छ।
